KHub the we din ki hum tere giraftaron mein the

ḳhuub the ve din ki ham tere giraftāroñ meñ the

ġham-zadoñ andoh-gīnoñ zulm ke māroñ meñ the

dushmanī jaanī hai ab to ham se ġhairoñ ke liye

ik samāñ sā ho gayā vo bhī ki ham yāroñ meñ the

mat tabaḳhtūr se guzar qumrī hamārī ḳhaak par

ham bhī ik sarv-e-ravāñ ke nāz-bardāroñ meñ the

mar ga.e lekin na dekhā tū ne ūdhar aañkh uThā

aah kyā kyā log zālim tere bīmāroñ meñ the

shaiḳh-jī mindīl kuchh bigḌī sī hai kyā aap bhī

rindoñ bāñkoñ mai-kashoñ āshufta dastāroñ meñ the

garche jurm-e-ishq ġhairoñ par bhī sābit thā vale

qatl karnā thā hameñ ham hī gunahgāroñ meñ the

ik rahā mizhgāñ kī saf meñ ek ke TukḌe hue

dil jigar jo 'mīr' donoñ apne ġham-ḳhvāroñ meñ the

KHub the we din ki hum tere giraftaron mein the

gham-zadon andoh-ginon zulm ke maron mein the

dushmani jaani hai ab to hum se ghairon ke liye

ek saman sa ho gaya wo bhi ki hum yaron mein the

mat tabaKHtur se guzar qumri hamari KHak par

hum bhi ek sarw-e-rawan ke naz-bardaron mein the

mar gae lekin na dekha tu ne udhar aankh uTha

aah kya kya log zalim tere bimaron mein the

shaiKH-ji mindil kuchh bigDi si hai kya aap bhi

rindon bankon mai-kashon aashufta dastaron mein the

garche jurm-e-ishq ghairon par bhi sabit tha wale

qatl karna tha hamein hum hi gunahgaron mein the

ek raha mizhgan ki saf mein ek ke TukDe hue

dil jigar jo 'mir' donon apne gham-KHwaron mein the