kya kya baiThe bigaD bigaD tum par hum tum se banae gae

kyā kyā baiThe bigaḌ bigaḌ tum par ham tum se banā.e ga.e

chupke bāteñ uThā.e ga.e sar gaaḌe vo haiñ aa.e ga.e

uTThe naqāb jahāñ se yārab jis se takalluf beach meñ hai

jab nikle us raah se ho kar muñh tum ham se chhupā.e ga.e

kab kab tum ne sach nahīñ mānīñ jhūTī bāteñ ġhairoñ kī

tum ham ko yuuñ hī jalā.e ga.e ve tum ko vo haiñ lagā.e ga.e

sub.h vo aafat uTh baiThā thā tum ne na dekhā sad afsos

kyā kyā fitne sar joḌe palkoñ ke saa.e saa.e ga.e

allāh re ye dīda-darā.ī huuñ na mukaddar kyūñke ham

āñkheñ ham se milā.e ga.e phir ḳhaak meñ ham ko milā.e ga.e

aag meñ ġham kī ho ke gudāzāñ jism huā sab paanī sā

ya.anī bin in shola-ruḳhoñ ke ḳhuub hī ham bhī taa.e ga.e

TukḌe TukḌe karne kī bhī had ek āḳhir hotī hai

kushte us kī teġh-e-sitam ke gor ta.iiñ kab laa.e ga.e

ḳhizr jo mil jaatā hai gaahe aap ko bhūlā ḳhuub nahīñ

kho.e ga.e us raah ke varna kaahe ko phir paa.e ga.e

marne se kyā 'mīr'-jī-sāhab ham ko hosh the kyā kariye

jī se haath uThā.e ga.e par us se dil na uThā.e ga.e

kya kya baiThe bigaD bigaD tum par hum tum se banae gae

chupke baaten uThae gae sar gaDe wo hain aae gae

uTThe naqab jahan se yarab jis se takalluf beach mein hai

jab nikle us rah se ho kar munh tum hum se chhupae gae

kab kab tum ne sach nahin manin jhuTi baaten ghairon ki

tum hum ko yun hi jalae gae we tum ko wo hain lagae gae

subh wo aafat uTh baiTha tha tum ne na dekha sad afsos

kya kya fitne sar joDe palkon ke sae sae gae

allah re ye dida-darai hun na mukaddar kyunke hum

aankhen hum se milae gae phir KHak mein hum ko milae gae

aag mein gham ki ho ke gudazan jism hua sab pani sa

yani bin in shola-ruKHon ke KHub hi hum bhi tae gae

TukDe TukDe karne ki bhi had ek aaKHir hoti hai

kushte us ki tegh-e-sitam ke gor tain kab lae gae

KHizr jo mil jata hai gahe aap ko bhula KHub nahin

khoe gae us rah ke warna kahe ko phir pae gae

marne se kya 'mir'-ji-sahab hum ko hosh the kya kariye

ji se hath uThae gae par us se dil na uThae gae