tegh-e-sitam se uski mera sar juda hua

teġh-e-sitam se us kī mirā sar judā huā

shukr ḳhudā ki haq mohabbat adā huā

qāsid ko de ke ḳhat nahīñ kuchh bhejnā zarūr

jaatā hai ab to jī hī hamārā chalā huā

vo to nahīñ ki ashk thame hī na aañkh se

nikle hai koī laḳht-e-dil ab sau jalā huā

hairān rañg bāġh-e-jahāñ thā bahut rukā

tasvīr kī kalī kī tarah dil na vā huā

aalam kī be-fizā.ī se tañg aa ga.e the ham

jaagā se dil gayā jo hamārā bajā huā

dar pe hamāre jī ke huā ġhair ke liye

anjām-e-kār mudda.ī kā mudda.ā huā

us ke ga.e pe dil kī ḳharābī na pochhiye

jaise kaso kā koī nagar ho luTā huā

bad-tar hai ziist marg se hijrān-e-yār meñ

bīmār dil bhalā na huā to bhalā huā

kahtā thā 'mīr' haal to jab tak to thā bhalā

kuchh zabt karte karte tirā haal kyā huā

tegh-e-sitam se us ki mera sar juda hua

shukr KHuda ki haq mohabbat ada hua

qasid ko de ke KHat nahin kuchh bhejna zarur

jata hai ab to ji hi hamara chala hua

wo to nahin ki ashk thame hi na aankh se

nikle hai koi laKHt-e-dil ab sau jala hua

hairan rang bagh-e-jahan tha bahut ruka

taswir ki kali ki tarah dil na wa hua

aalam ki be-fizai se tang aa gae the hum

jaga se dil gaya jo hamara baja hua

dar pe hamare ji ke hua ghair ke liye

anjam-e-kar muddai ka muddaa hua

us ke gae pe dil ki KHarabi na pochhiye

jaise kaso ka koi nagar ho luTa hua

bad-tar hai zist marg se hijran-e-yar mein

bimar dil bhala na hua to bhala hua

kahta tha 'mir' haal to jab tak to tha bhala

kuchh zabt karte karte tera haal kya hua