raftar-o-taur-o-tarz-o-rawish ka ye Dhab hai kya

raftār-o-taur-o-tarz-o-ravish kā ye Dhab hai kyā

pahle sulūk aise hī tere the ab hai kyā

ham dil-zada na rakhte the tum se ye chashm-dāsht

karte ho qahr lutf kī jaagā ġhazab hai kyā

izzat bhī ba.ad zillat bisyār chheḌ hai

majlis meñ jab ḳhafīf kiyā phir adab hai kyā

aa.e ham aap meñ to na pahchāne phir ga.e

us rāh-e-sa.ab ishq meñ yaaro ta.ab hai kyā

hairāñ haiñ us dahan ke azīzān-e-ḳhurda-bīñ

ye bhī maqām haa.e ta.ammul talab hai kyā

āñkheñ jo hoveñ terī to tū ain kar rakhe

aalam tamām gar vo nahīñ to ye sab hai kyā

us āftāb bin nahīñ kuchh sūjhtā hameñ

gar ye hī apne din haiñ to tārīk shab hai kyā

tum ne hamesha jaur-o-sitam be-sabab kiye

apnā hī zarf thā jo na pūchhā sabab hai kyā

kyūñkar tumhārī baat kare koī e.atibār

zāhir meñ kyā kaho ho suḳhan zer-e-lab hai kyā

us mah baġhair 'mīr' kā marnā ajab huā

har-chand marg-e-āshiq miskīñ ajab hai kyā

raftar-o-taur-o-tarz-o-rawish ka ye Dhab hai kya

pahle suluk aise hi tere the ab hai kya

hum dil-zada na rakhte the tum se ye chashm-dasht

karte ho qahr lutf ki jaga ghazab hai kya

izzat bhi baad zillat bisyar chheD hai

majlis mein jab KHafif kiya phir adab hai kya

aae hum aap mein to na pahchane phir gae

us rah-e-sab ishq mein yaro tab hai kya

hairan hain us dahan ke azizan-e-KHurda-bin

ye bhi maqam hae tammul talab hai kya

aankhen jo howen teri to tu ain kar rakhe

aalam tamam gar wo nahin to ye sab hai kya

us aaftab bin nahin kuchh sujhta hamein

gar ye hi apne din hain to tarik shab hai kya

tum ne hamesha jaur-o-sitam be-sabab kiye

apna hi zarf tha jo na puchha sabab hai kya

kyunkar tumhaari baat kare koi eatibar

zahir mein kya kaho ho suKHan zer-e-lab hai kya

us mah baghair 'mir' ka marna ajab hua

har-chand marg-e-ashiq miskin ajab hai kya