ghalat hai ishq mein ai bul-hawas andesha rahat ka

ġhalat hai ishq meñ ai bul-havas andesha rāhat kā

rivāj is mulk meñ hai dard-o-dāġh-o-ranj-o-kulfat kā

zamīñ ik safha-e-tasvīr be-hoshāñ se maanā hai

ye majlis jab se hai achchhā nahīñ kuchh rañg sohbat kā

jahāñ jalve se us mahbūb ke yaksar labālab hai

nazar paidā kar avval phir tamāshā dekh qudrat kā

hanūz āvāra-e-lailā hai jān-e-rafta majnūñ kī

muue par bhī rahā hotā nahīñ vābasta ulfat kā

harīf-e-be-jigar hai sabr varna kal kī sohbat meñ

niyāz-o-nāz kā jhagḌā giro thā ek jur.at kā

nigāh-e-yās bhī is said-e-afgan par ġhanīmat hai

nihāyat tañg hai ai said-e-bismil vaqt fursat kā

ḳharābī dil kī is had hai ki ye samjhā nahīñ jaatā

ki ābādī bhī yaañ thī yā ki vīrāna thā muddat kā

nigāh-e-mast ne us kī luTā.ī ḳhānqa saarī

paḌā hai barham ab tak kārḳhāna zohd-o-tā.at kā

qadam Tak dekh kar rakh 'mīr' sar dil se nikālegā

palak se shoḳh-tar kāñTā hai sahrā-e-mohabbat kā

ghalat hai ishq mein ai bul-hawas andesha rahat ka

riwaj is mulk mein hai dard-o-dagh-o-ranj-o-kulfat ka

zamin ek safha-e-taswir be-hoshan se mana hai

ye majlis jab se hai achchha nahin kuchh rang sohbat ka

jahan jalwe se us mahbub ke yaksar labaalab hai

nazar paida kar awwal phir tamasha dekh qudrat ka

hanuz aawara-e-laila hai jaan-e-rafta majnun ki

mue par bhi raha hota nahin wabasta ulfat ka

harif-e-be-jigar hai sabr warna kal ki sohbat mein

niyaz-o-naz ka jhagDa giro tha ek jurat ka

nigah-e-yas bhi is said-e-afgan par ghanimat hai

nihayat tang hai ai said-e-bismil waqt fursat ka

KHarabi dil ki is had hai ki ye samjha nahin jata

ki aabaadi bhi yan thi ya ki virana tha muddat ka

nigah-e-mast ne us ki luTai KHanqa sari

paDa hai barham ab tak karKHana zohd-o-taat ka

qadam Tak dekh kar rakh 'mir' sar dil se nikalega

palak se shoKH-tar kanTa hai sahra-e-mohabbat ka