dil ishq ka hamesha harif-e-nabard tha

dil ishq kā hamesha harīf-e-nabard thā

ab jis jagah ki daaġh hai yaañ aage dard thā

ik gard-e-rāh thā pai-e-mahmil tamām raah

kis kā ġhubār thā ki ye dumbāla gard thā

dil kī shikastagī ne Darā.e rakhā hameñ

vaañ chiiñ jabīñ par aa.ī ki yaañ rañg zard thā

mānind-e-harf safha-e-hastī se uTh gayā

dil bhī mirā jarīda-e-ālam meñ fard thā

thā pushta reg-e-bād ye ik vaqt kārvāñ

ye gard-bād koī bayābāñ navard thā

guzrī mudām us kī javānān-e-mast meñ

pīr-e-muġhāñ bhī turfa koī piir mard thā

āshiq haiñ ham to 'mīr' ke bhī zabt-e-ishq ke

dil jal gayā thā aur nafas lab pe sard thā

dil ishq ka hamesha harif-e-nabard tha

ab jis jagah ki dagh hai yan aage dard tha

ek gard-e-rah tha pai-e-mahmil tamam rah

kis ka ghubar tha ki ye dumbaala gard tha

dil ki shikastagi ne Darae rakha hamein

wan chin jabin par aai ki yan rang zard tha

manind-e-harf safha-e-hasti se uTh gaya

dil bhi mera jarida-e-alam mein fard tha

tha pushta reg-e-baad ye ek waqt karwan

ye gard-baad koi bayaban naward tha

guzri mudam us ki jawanan-e-mast mein

pir-e-mughan bhi turfa koi pir mard tha

aashiq hain hum to 'mir' ke bhi zabt-e-ishq ke

dil jal gaya tha aur nafas lab pe sard tha