kahin pahuncho bhi mujh be-pa-o-sar tak

kahīñ pahuñcho bhī mujh be-pā-o-sar tak

ki pahuñchā sham.a-sāñ daaġh ab jigar tak

kuchh apnī aañkh meñ yaañ kā na aayā

ḳhazaf se le ke dekhā dar-e-tar tak

jise shab aag sā dekhā sulagte

use phir ḳhaak hī paayā sahar tak

tirā muñh chāñd sā dekhā hai shāyad

ki anjum rahte haiñ har shab idhar tak

jab aayā aah tab apne hī sar par

gayā ye haath kab us kī kamar tak

ham āvāzoñ ko sair ab kī mubārak

par-o-bāl apne bhī aise the par tak

khiñchī kyā kyā ḳharābī zer-e-dīvār

vale aayā na vo Tak ghar se dar tak

galī tak terī laayā thā hameñ shauq

kahāñ tāqat ki ab phir jaa.eñ ghar tak

yahī dard-e-judā.ī hai jo is shab

to aatā hai jigar mizhgān-e-tar tak

dikhā.ī deñge ham mayyat ke rañgoñ

agar rah jā.eñge jiite sahar tak

kahāñ phir shor shevan jab gayā 'mīr'

ye hañgāma hai is hī nauhagar tak

kahin pahuncho bhi mujh be-pa-o-sar tak

ki pahuncha shama-san dagh ab jigar tak

kuchh apni aankh mein yan ka na aaya

KHazaf se le ke dekha dar-e-tar tak

jise shab aag sa dekha sulagte

use phir KHak hi paya sahar tak

tera munh chand sa dekha hai shayad

ki anjum rahte hain har shab idhar tak

jab aaya aah tab apne hi sar par

gaya ye hath kab us ki kamar tak

hum aawazon ko sair ab ki mubarak

par-o-baal apne bhi aise the par tak

khinchi kya kya KHarabi zer-e-diwar

wale aaya na wo Tak ghar se dar tak

gali tak teri laya tha hamein shauq

kahan taqat ki ab phir jaen ghar tak

yahi dard-e-judai hai jo is shab

to aata hai jigar mizhgan-e-tar tak

dikhai denge hum mayyat ke rangon

agar rah jaenge jite sahar tak

kahan phir shor shewan jab gaya 'mir'

ye hangama hai is hi nauhagar tak