mera diwangi par is qadar maghrur ho jaana

mirā dīvāngī par is qadar maġhrūr ho jaanā

ki rafta rafta hadd-e-āgahī se duur ho jaanā

pata detā hai gumrāhī-e-rahgīr-e-mohabbat kā

bichhaḌnā aur bichhaḌ kar qāfile se duur ho jaanā

kahīñ duniyā-e-ulfat ko tah-o-bālā na kar Daale

ġhurūr-e-husn ke aa.iin kā dastūr ho jaanā

azal se tīra-baḳht-e-ishq ke hisse meñ aayā hai

shab-e-ġham-e-dil kā jal jal kar charāġh-e-tūr ho jaanā

mirī dānist-e-nāqis meñ kamāl-e-ḳhud-numā.ī hai

zamīñ se āsmāñ tak aap kā mash.hūr ho jaanā

kisī kā jashn-e-āzādī manānā hai bahut āsāñ

magar dushvār hai ġhārat-gar-e-jamhūr ho jaanā

ragoñ kā ḳhuun rafta rafta ThanDā ho chalā 'maikash'

mire dard-e-jigar ko aa gayā kāfūr ho jaanā

mera diwangi par is qadar maghrur ho jaana

ki rafta rafta hadd-e-agahi se dur ho jaana

pata deta hai gumrahi-e-rahgir-e-mohabbat ka

bichhaDna aur bichhaD kar qafile se dur ho jaana

kahin duniya-e-ulfat ko tah-o-baala na kar Dale

ghurur-e-husn ke aain ka dastur ho jaana

azal se tira-baKHt-e-ishq ke hisse mein aaya hai

shab-e-gham-e-dil ka jal jal kar charagh-e-tur ho jaana

meri danist-e-naqis mein kamal-e-KHud-numai hai

zamin se aasman tak aap ka mashhur ho jaana

kisi ka jashn-e-azadi manana hai bahut aasan

magar dushwar hai ghaarat-gar-e-jamhur ho jaana

ragon ka KHun rafta rafta ThanDa ho chala 'maikash'

mere dard-e-jigar ko aa gaya kafur ho jaana