mera dil bhi muamma ho gaya hai

mirā dil bhī muamma ho gayā hai

bharī-mahfil meñ tanhā ho gayā hai

baḌā āsān jiinā ho gayā hai

garāñ phir lamha lamha ho gayā hai

jo rotā thā mire zaḳhmoñ pe yaaro

vo ā.īna bhī andhā ho gayā hai

nazar aatā nahīñ insān koī

hamārā shahr sahrā ho gayā hai

koī bhī shai qarīne se nahīñ hai

ajab dil kā gharauñdā ho gayā hai

mirā ghar muntazir hai raushnī kā

zamāne meñ saverā ho gayā hai

kahāñ hai ġhair jānib-dār koī

adū saarā zamāna ho gayā hai

shab-e-ġham muḳhtasar hone lagī hai

marīz-e-hijr chañgā ho gayā hai

falak par āj-kal hī aise-vaise

ġhurūb apnā sitārā ho gayā hai

jise maiñ qatl kar aayā thā 'saifī'

vahī ab mujh meñ zinda ho gayā hai

mera dil bhi muamma ho gaya hai

bhari-mahfil mein tanha ho gaya hai

baDa aasan jina ho gaya hai

garan phir lamha lamha ho gaya hai

jo rota tha mere zaKHmon pe yaro

wo aaina bhi andha ho gaya hai

nazar aata nahin insan koi

hamara shahr sahra ho gaya hai

koi bhi shai qarine se nahin hai

ajab dil ka gharaunda ho gaya hai

mera ghar muntazir hai raushni ka

zamane mein sawera ho gaya hai

kahan hai ghair jaanib-dar koi

adu sara zamana ho gaya hai

shab-e-gham muKHtasar hone lagi hai

mariz-e-hijr changa ho gaya hai

falak par aaj-kal hi aise-waise

ghurub apna sitara ho gaya hai

jise main qatl kar aaya tha 'saifi'

wahi ab mujh mein zinda ho gaya hai