mera dil nahin hai mere hat tum bin

mirā dil nahīñ hai mere haat tum bin

ḳhush aatī nahīñ kisī kī baat tum bin

ghaTā ġham ashk paanī aah bijlī

barastā hai ajab barsāt tum bin

pukāroñ kyuuñ na maiñ ''he dost he dost''

ki har shab qatl kī hai raat tum bin

kabhī to aa.egī phir vasl kī aan

kiyā ġham ne mire par ghaat tum bin

'sirāj' az-bas ki hai be-tāb-e-dīdār

use hai zindagī sakrāt tum bin

mera dil nahin hai mere hat tum bin

KHush aati nahin kisi ki baat tum bin

ghaTa gham ashk pani aah bijli

barasta hai ajab barsat tum bin

pukaron kyun na main he dost he dost

ki har shab qatl ki hai raat tum bin

kabhi to aaegi phir wasl ki aan

kiya gham ne mere par ghat tum bin

'siraj' az-bas ki hai be-tab-e-didar

use hai zindagi sakraat tum bin