mera din KHubsurat yun bana deta to kya hota

mirā din ḳhūbsūrat yuuñ banā detā to kyā hotā

vo ham ko pyaar se aa kar jagā detā to kyā hotā

bahut vā'de kiye the aap ne to saath rahne ke

mohabbat meñ agar ik do nibhā dete to kyā hotā

mirā is shab kī tārīkī se dil bechain hotā hai

ruḳh-e-anvar se vo parda haTā dete to kyā hotā

musavvir huuñ tasavvur aap kī tasvīr hai merā

tumheñ gar apnī yādoñ se miTā dete to kyā hotā

maiñ kab se muntazir thā aap kī nazar-e-karāmat kā

jo lamhe bhar ko hī chehra dikhā dete to kyā hotā

'ajab ye shauq hai galiyoñ meñ terī roz aatā huuñ

tirī rāhoñ meñ hī ghar ko banā dete to kyā hotā

maiñ apne zaḳhm ḳhud hī dekh kar ḳhud se ye kahtā huuñ

vo hañs kar Taal jaate haiñ sazā dete to kyā hotā

hai un kī shā'irī kā bhī bahut charchā zabānoñ par

ġhazal ham ko bhī vo 'haidar' sunā dete to kyā hotā

mera din KHubsurat yun bana deta to kya hota

wo hum ko pyar se aa kar jaga deta to kya hota

bahut wa'de kiye the aap ne to sath rahne ke

mohabbat mein agar ek do nibha dete to kya hota

mera is shab ki tariki se dil bechain hota hai

ruKH-e-anwar se wo parda haTa dete to kya hota

musawwir hun tasawwur aap ki taswir hai mera

tumhein gar apni yaadon se miTa dete to kya hota

main kab se muntazir tha aap ki nazar-e-karamat ka

jo lamhe bhar ko hi chehra dikha dete to kya hota

'ajab ye shauq hai galiyon mein teri roz aata hun

teri rahon mein hi ghar ko bana dete to kya hota

main apne zaKHm KHud hi dekh kar KHud se ye kahta hun

wo hans kar Tal jate hain saza dete to kya hota

hai un ki sha'iri ka bhi bahut charcha zabanon par

ghazal hum ko bhi wo 'haidar' suna dete to kya hota