mera gham tha na-mukammal gham-e-na-gahan se pahle

mirā ġham thā nā-mukammal ġham-e-nā-gahāñ se pahle

mirī ziist be-maza thī tire imtihāñ se pahle

ye mizāj-e-āshiqī hai ye mizāj-e-zindagī hai

ġham-e-dost chāhtā huuñ ġham-e-do-jahāñ se pahle

tirī yaad se munavvar haiñ vo rāste abhī tak

tirī justujū meñ guzrā maiñ jahāñ jahāñ se pahle

tire sang-e-dar se pūchhe koī is jabīñ kī qīmat

jo kahīñ na ḳham huī ho tire āstāñ se pahle

ye maqām-e-ishq 'jauhar' hai baḌī hī saḳht manzil

ka.ī kārvāñ hue gum mire kārvāñ se pahle

mera gham tha na-mukammal gham-e-na-gahan se pahle

meri zist be-maza thi tere imtihan se pahle

ye mizaj-e-ashiqi hai ye mizaj-e-zindagi hai

gham-e-dost chahta hun gham-e-do-jahan se pahle

teri yaad se munawwar hain wo raste abhi tak

teri justuju mein guzra main jahan jahan se pahle

tere sang-e-dar se puchhe koi is jabin ki qimat

jo kahin na KHam hui ho tere aastan se pahle

ye maqam-e-ishq 'jauhar' hai baDi hi saKHt manzil

kai karwan hue gum mere karwan se pahle