مرا حریف کوئی ہے کہاں اکیلا ہوں

مرا حریف کوئی ہے کہاں اکیلا ہوں

حریص لذت لفظ و بیاں اکیلا ہوں

حصار جسم سے باہر ہے کون میرے سوا

سنبھالے ہاتھوں پہ میں نقد جاں اکیلا ہوں

میں ایک سنگ ہدایت کھڑا ہوں صدیوں سے

یہ غم نہیں کہ پس کارواں اکیلا ہوں

تمام لوگ تو بے حس ہیں سنگ کی صورت

میں اپنے عہد کا اک نوحہ خواں اکیلا ہوں

سب اپنے چہرے پہ تنقید خود ہی کرتے ہیں

میں آئنے کی طرح بے زباں اکیلا ہوں

نہ اب وہ بزم سماعت نہ اب وہ محفل شب

سنا ہوا سخن رائیگاں اکیلا ہوں

بہت ہے میرے لئے یاد رفتگاں انورؔ

اکیلا ہوتے ہوئے بھی کہاں اکیلا ہوں