mera harif koi hai kahan akela hun

mirā harīf koī hai kahāñ akelā huuñ

harīs-e-lazzat-e-lafz-o-bayāñ akelā huuñ

hisār-e-jism se bāhar hai kaun mere sivā

sañbhāle hāthoñ pe maiñ naqd-e-jāñ akelā huuñ

maiñ ek sang-e-hidāyat khaḌā huuñ sadiyoñ se

ye ġham nahīñ ki pas-e-kārvāñ akelā huuñ

tamām log to behis haiñ sang kī sūrat

maiñ apne ahd kā ik nauha-ḳhvāñ akelā huuñ

sab apne chehre pe tanqīd ḳhud hī karte haiñ

maiñ aa.ine kī tarah be-zabāñ akelā huuñ

na ab vo bazm-e-samā.at na ab vo mahfil-e-shab

sunā huā suḳhan-e-rā.egāñ akelā huuñ

bahut hai mere liye yād-e-raftagāñ 'anvar'

akelā hote hue bhī kahāñ akelā huuñ

mera harif koi hai kahan akela hun

haris-e-lazzat-e-lafz-o-bayan akela hun

hisar-e-jism se bahar hai kaun mere siwa

sanbhaale hathon pe main naqd-e-jaan akela hun

main ek sang-e-hidayat khaDa hun sadiyon se

ye gham nahin ki pas-e-karwan akela hun

tamam log to behis hain sang ki surat

main apne ahd ka ek nauha-KHwan akela hun

sab apne chehre pe tanqid KHud hi karte hain

main aaine ki tarah be-zaban akela hun

na ab wo bazm-e-samaat na ab wo mahfil-e-shab

suna hua suKHan-e-raegan akela hun

bahut hai mere liye yaad-e-raftagan 'anwar'

akela hote hue bhi kahan akela hun