mera jina gawahi de raha hai

mirā jiinā gavāhī de rahā hai

abhī mujh ko bahut kuchh dekhnā hai

mujhe hairat hai apne dil pe kitnī

ye merā saath ab tak de rahā hai

koī roke ravānī āñsuoñ kī

ye dariyā bahte bahte thak gayā hai

maiñ paḌh saktī huuñ un-likkhe ko ab bhī

ye kashf-e-zāt hai yā ik sazā hai

ye kaisī sāzishoñ meñ ghar ga.ī huuñ

mujhe mujh se chhupāyā jā rahā hai

ghane jañgal meñ tanhā chhoḌ kar vo

kahīñ se chhup ke mujh ko dekhtā hai

ḳhudā-hāfiz mire ai ham-nashīno

ki mujh ko to bulāvā aa gayā hai

kashish kuchh is qadar hai mujh meñ 'shabnam'

samundar merī jānib baḌh rahā hai

mera jina gawahi de raha hai

abhi mujh ko bahut kuchh dekhna hai

mujhe hairat hai apne dil pe kitni

ye mera sath ab tak de raha hai

koi roke rawani aansuon ki

ye dariya bahte bahte thak gaya hai

main paDh sakti hun un-likkhe ko ab bhi

ye kashf-e-zat hai ya ek saza hai

ye kaisi sazishon mein ghar gai hun

mujhe mujh se chhupaya ja raha hai

ghane jangal mein tanha chhoD kar wo

kahin se chhup ke mujh ko dekhta hai

KHuda-hafiz mere ai ham-nashino

ki mujh ko to bulawa aa gaya hai

kashish kuchh is qadar hai mujh mein 'shabnam'

samundar meri jaanib baDh raha hai