mera junun-e-mohabbat to koi raaz nahin

mirā junūn-e-mohabbat to koī raaz nahīñ

tire hī paas magar chashm-e-imtiyāz nahīñ

sabab ye hai jo hai tū kaif-e-ishq se mahrūm

ki soz-e-ishq to hai dil meñ tere saaz nahīñ

kuchh aur din use rakh ātish-e-mohabbat par

ki tere shīsha-e-dil meñ abhī gudāz nahīñ

vabāl-e-jāñ ho na kyoñ ishq ke asīroñ ko

vo dil jo terī mohabbat se sarfarāz nahīñ

karam kahūñ ise qudrat kā yā sitam samjhūñ

ki dil diyā hai magar koī dil-navāz nahīñ

bas ek lafz-e-mohabbat ke mā-sivā kyā hai

suneñ jo vo to mirī dāstāñ darāz nahīñ

atā-e-ḳhās hai terī mirā ye zauq-e-junūñ

atā pe naaz hai mujh ko junūñ pe naaz nahīñ

koī kisī se ye kah de ki merā ishq 'jalīl'

bahāna-sāz hai lekin zamāna-sāz nahīñ

mera junun-e-mohabbat to koi raaz nahin

tere hi pas magar chashm-e-imtiyaz nahin

sabab ye hai jo hai tu kaif-e-ishq se mahrum

ki soz-e-ishq to hai dil mein tere saz nahin

kuchh aur din use rakh aatish-e-mohabbat par

ki tere shisha-e-dil mein abhi gudaz nahin

wabaal-e-jaan ho na kyon ishq ke asiron ko

wo dil jo teri mohabbat se sarfaraaz nahin

karam kahun ise qudrat ka ya sitam samjhun

ki dil diya hai magar koi dil-nawaz nahin

bas ek lafz-e-mohabbat ke ma-siwa kya hai

sunen jo wo to meri dastan daraaz nahin

ata-e-KHas hai teri mera ye zauq-e-junun

ata pe naz hai mujh ko junun pe naz nahin

koi kisi se ye kah de ki mera ishq 'jalil'

bahana-saz hai lekin zamana-saz nahin