mera KHwab-e-tamanna saat-e-bedar jaisa hai

mirā ḳhvāb-e-tamannā sā.at-e-bedār jaisā hai

magar ik ik nafas chaltī huī talvār jaisā hai

nazar apnī navāh-e-rañg se aage nahīñ baḌhtī

pas-e-manzar yaqīnan sāya-e-dīvār jaisā hai

dil-āzārī mirī fitrat meñ shāmil hai na aadat meñ

tumheñ ma.alūm hī hogā mirā kirdār jaisā hai

tamannā.ī to haiñ lekin koī aage nahīñ baḌhtā

mirī shohrat kā hañgāma farāz-e-dār jaisā hai

samundar aadmī kā khā gayā kitne safīne ko

yahāñ jo shahr hai vo dosto mañjdhār jaisā hai

ye duniyā milkiyat apnī na virsa hai buzurgoñ kā

yahāñ jo aadmī hai vo kirā.e-dār jaisā hai

talavvun ke sivā kuchh bhī nahīñ miltā manāzir meñ

kisī mausam se miliye vo mizāj-e-yār jaisā hai

ye kyūñkar munfarid hotā hai ye uslūb-e-ġhazal terā

zamīñ ke rañg jaisā chāñd ke ruḳhsār jaisā hai

milo jis se bhī vo sūd-o-ziyāñ kī guftugū chheḌe

hamāre ahd meñ rishta bhī kārobār jaisā hai

hazāroñ kaam hoñ paḌhiye magar column zarūrat kā

mire bachche kā chehra sub.h ke aḳhbār jaisā hai

mubārak 'ramz' tujh ko ḳhusrav-e-mulk-e-suḳhan honā

hathelī meñ jo chhālā hai vahī dīnār jaisā hai

mera KHwab-e-tamanna saat-e-bedar jaisa hai

magar ek ek nafas chalti hui talwar jaisa hai

nazar apni nawah-e-rang se aage nahin baDhti

pas-e-manzar yaqinan saya-e-diwar jaisa hai

dil-azari meri fitrat mein shamil hai na aadat mein

tumhein malum hi hoga mera kirdar jaisa hai

tamannai to hain lekin koi aage nahin baDhta

meri shohrat ka hangama faraaz-e-dar jaisa hai

samundar aadmi ka kha gaya kitne safine ko

yahan jo shahr hai wo dosto manjdhaar jaisa hai

ye duniya milkiyat apni na wirsa hai buzurgon ka

yahan jo aadmi hai wo kirae-dar jaisa hai

talawwun ke siwa kuchh bhi nahin milta manazir mein

kisi mausam se miliye wo mizaj-e-yar jaisa hai

ye kyunkar munfarid hota hai ye uslub-e-ghazal tera

zamin ke rang jaisa chand ke ruKHsar jaisa hai

milo jis se bhi wo sud-o-ziyan ki guftugu chheDe

hamare ahd mein rishta bhi karobar jaisa hai

hazaron kaam hon paDhiye magar column zarurat ka

mere bachche ka chehra subh ke aKHbar jaisa hai

mubarak 'ramz' tujh ko KHusraw-e-mulk-e-suKHan hona

hatheli mein jo chhaala hai wahi dinar jaisa hai