mera nahin to wo apna hi kuchh KHayal kare

mirā nahīñ to vo apnā hī kuchh ḳhayāl kare

use kaho ki ta.alluq ko phir bahāl kare

nigāh-e-yār na ho to nikhar nahīñ paatā

koī jamāl kī jitnī bhī dekh-bhāl kare

mile to itnī ri.āyat atā kare mujh ko

mire javāb ko sun kar koī savāl kare

kalām kar ki mire lafz ko suhulat ho

tirā sukūt mirī guftugū muhāl kare

bulandiyoñ pe kahāñ tak tujhe talāsh karūñ

har ek saañs pe umr-e-ravāñ zavāl kare

vo hoñT hoñ ki tabassum sukūt ho ki suḳhan

tirā jamāl har ik rañg meñ kamāl kare

maiñ us kā phuul huuñ 'nayyar' so us pe chhoḌ diyā

vo gesuoñ meñ sajā.e ki pā.emāl kare

mera nahin to wo apna hi kuchh KHayal kare

use kaho ki talluq ko phir bahaal kare

nigah-e-yar na ho to nikhar nahin pata

koi jamal ki jitni bhi dekh-bhaal kare

mile to itni riayat ata kare mujh ko

mere jawab ko sun kar koi sawal kare

kalam kar ki mere lafz ko suhulat ho

tera sukut meri guftugu muhaal kare

bulandiyon pe kahan tak tujhe talash karun

har ek sans pe umr-e-rawan zawal kare

wo honT hon ki tabassum sukut ho ki suKHan

tera jamal har ek rang mein kamal kare

main us ka phul hun 'nayyar' so us pe chhoD diya

wo gesuon mein sajae ki paemal kare