mera tafakkur ghubar-sochen nikhaarta hai

mirā tafakkur ġhubār-socheñ nikhārtā hai

ki merī āñkhoñ meñ surḳh shabnam utārtā hai

maiñ aaj ḳhauf-e-ḳhudā se mahrūm ho gayā huuñ

ka.ī ḳhudāoñ kā ḳhauf ab mujh ko mārtā hai

Darā rahā hai mujhe vo mere paḌosiyoñ se

mire jigar meñ jo zahr-e-ḳhanjar utārtā hai

mire mohalle meñ mere bhaa.ī jhagaḌ rahe haiñ

udhar koī apne tarkashoñ ko sañvārtā hai

hisār-e-zulmat meñ kab se insāñ bhaTak rahā hai

kisī na.e din ko daur-e-hāzir pukārtā hai

dam-e-sarāfīl hai naqīb-e-jahān-e-nau hai

vo ek jazba ki sar diloñ meñ ubhārtā hai

naved hai ik jahān-e-nau kī isī ke dam se

hamārī rūhoñ meñ irtiqā par sañvārtā hai

mera tafakkur ghubar-sochen nikhaarta hai

ki meri aankhon mein surKH shabnam utarta hai

main aaj KHauf-e-KHuda se mahrum ho gaya hun

kai KHudaon ka KHauf ab mujh ko marta hai

Dara raha hai mujhe wo mere paDosiyon se

mere jigar mein jo zahr-e-KHanjar utarta hai

mere mohalle mein mere bhai jhagaD rahe hain

udhar koi apne tarkashon ko sanwarta hai

hisar-e-zulmat mein kab se insan bhaTak raha hai

kisi nae din ko daur-e-hazir pukarta hai

dam-e-sarafil hai naqib-e-jahan-e-nau hai

wo ek jazba ki sar dilon mein ubhaarta hai

nawed hai ek jahan-e-nau ki isi ke dam se

hamari ruhon mein irtiqa par sanwarta hai