mera wajud samundar nahin main qatra hun

mirā vajūd samundar nahīñ maiñ qatra huuñ

har ek mauj kī āġhosh meñ machaltā huuñ

maiñ musht-e-ḳhāk huuñ gard-o-ġhubār jaisā huuñ

tamām vus.at-e-ālam pe phir bhī chhāyā huuñ

qazā-o-qadr kā manzar mirī nigāh meñ hai

hayāt-var huuñ ajal se nazar milātā huuñ

ye dahshatoñ ke chhalāve ye āfatoñ ke pahāḌ

ḳhudā kā shukr ki is daur meñ bhī zinda huuñ

uḌā.iye na havāoñ meñ merī bātoñ ko

sadā-e-vaqt huuñ maiñ vaqt kā taqāzā huuñ

koī bhī ruup ho pahchān lūñgā maiñ tujh ko

maiñ kā.enāt kī har chiiz se shanāsā huuñ

azal se hai tū mire ilm meñ kī tū kyā hai

batā sake to batā de mujhe ki maiñ kyā huuñ

diloñ meñ utreñ na kyoñ sab ke mere sher 'nashāt'

jo baat kahtā huuñ maiñ tajrabe kī kahtā huuñ

mera wajud samundar nahin main qatra hun

har ek mauj ki aaghosh mein machalta hun

main musht-e-KHak hun gard-o-ghubar jaisa hun

tamam wusat-e-alam pe phir bhi chhaya hun

qaza-o-qadr ka manzar meri nigah mein hai

hayat-war hun ajal se nazar milata hun

ye dahshaton ke chhalawe ye aafaton ke pahaD

KHuda ka shukr ki is daur mein bhi zinda hun

uDaiye na hawaon mein meri baaton ko

sada-e-waqt hun main waqt ka taqaza hun

koi bhi rup ho pahchan lunga main tujh ko

main kaenat ki har chiz se shanasa hun

azal se hai tu mere ilm mein ki tu kya hai

bata sake to bata de mujhe ki main kya hun

dilon mein utren na kyon sab ke mere sher 'nashat'

jo baat kahta hun main tajrabe ki kahta hun