مرا وجود وہی ہے تری کہانی میں

مرا وجود وہی ہے تری کہانی میں

کہ جیسے مچھلیاں پلتی ہیں یار پانی میں

لبوں کی چاشنی ہے آج تک وہی کی وہی

تمہارا نام لیا تھا کبھی روانی میں

بچھڑ کے اس سے کسی اور سے ملا تھا میں

بدل کے شکل وہ آیا تھا زندگانی میں

میں اس کے جسم کی خوشبو کو ڈھونڈھتا ہی رہا

نہ وہ گلاب میں پائی نہ رات رانی میں

کسی کو اندھے کنویں میں امان بخشی ہے

کسی کی جان بچائی ہے بہتے پانی میں

سخن کی بارشیں ہوتی ہیں آج تک کاشفؔ

کسی کا شعر سنا تھا کبھی جوانی میں