مرا یقین کہیں تھا مرا گمان کہیں

مرا یقین کہیں تھا مرا گمان کہیں

میں کھو گیا انہی دونوں کے درمیان کہیں

سخن طراز ہوا ہوں میں اپنے دل کے خلاف

چپک نہ جائے مرے نطق سے زبان کہیں

اسی لئے تو کبھی مجتمع نہ ہو پایا

مرا زمان کہیں تھا مرا مکان کہیں

مزاج دہر نہیں اعتدال پر صاحب

چلی نہ جائے مرے شہر سے امان کہیں

بیان کرنے لگا ہوں شکستگی دل کی

چلا نہ جائے تری سمت میرا دھیان کہیں

کمند ڈال رہا ہے دلوں پہ خوف منیرؔ

سمٹ نہ جائے پروں میں مری اڑان کہیں