mera ye mulk muqaddas kitab jaisa hai

mirā ye mulk muqaddas kitāb jaisā hai

har ek fard guloñ meñ gulāb jaisā hai

charāġh sab ne jalā.e haiñ amn ke lekin

añdherā vaqt kā ik āftāb jaisā hai

mileñ na haath faqat dil se dil bhī mil jaa.eñ

ye dekhne ko mujhe iztirāb jaisā hai

ajiib ḳhvāb kā hai intizār āñkhoñ ko

ye intizār bhī shāyad ki ḳhvāb jaisā hai

shumār meñ hameñ rakh be-shumār haiñ ham bhī

hameñ gila hī kahāñ hai hisāb jaisā hai

bharosa ab tire va.adoñ kā kyā kareñ saaqī

tirā ye jām-o-subū tak sarāb jaisā hai

tū de rahā hai kahāñ dars-e-ittihād 'asar'

tirā ḳhayāl faqat inqilāb jaisā hai

mera ye mulk muqaddas kitab jaisa hai

har ek fard gulon mein gulab jaisa hai

charagh sab ne jalae hain amn ke lekin

andhera waqt ka ek aaftab jaisa hai

milen na hath faqat dil se dil bhi mil jaen

ye dekhne ko mujhe iztirab jaisa hai

ajib KHwab ka hai intizar aankhon ko

ye intizar bhi shayad ki KHwab jaisa hai

shumar mein hamein rakh be-shumar hain hum bhi

hamein gila hi kahan hai hisab jaisa hai

bharosa ab tere wadon ka kya karen saqi

tera ye jam-o-subu tak sarab jaisa hai

tu de raha hai kahan dars-e-ittihad 'asar'

tera KHayal faqat inqilab jaisa hai