mere aibon ki islahen hua kin bahas-e-dushman se

mire aiboñ kī islāheñ huā kiiñ bahas-e-dushman se

liyā hai rāhbar kā kaam aksar maiñ ne dushman se

vo motī huuñ jo kho jaatā hai sāhil meñ samundar ke

vo daana huuñ bikhar ke duur hotā hai jo ḳhirman se

fazā sahrā kī āñkhoñ se jo dekheñ haiñ vo kah deñge

gul-e-ḳhud-rau kā aalam kam nahīñ gul-hā-e-gulshan se

kisī kī dostī yuuñ ḳhaak meñ koī milātā hai

mire baare meñ tum aur mashvare lete ho dushman se

tamāshā dekhiye mahshar meñ qātil mujh se laḌtā hai

ki apne ḳhuun kā dhabba chhuḌā de mere dāman se

zamīñ se āsmāñ tak chhā rahī jo ye udāsī hai

bagūla koī uTThā hai kisī bekas ke madfan se

qarīb-e-dar pahuñch kar yuuñ ġhash aane kā sabab āḳhir

ye mumkin hai jhalak us kī nazar aa.ī ho chilman se

har aafat se chaman mahfūz hai ab to ye suntā huuñ

adāvat barq-e-sarsar ko thī mere hī nasheman se

ġharaz kyā bahas-o-hujjat se hamārā to ye mashrab hai

jahāñ tak ho kināre hī rahe shaiḳh-o-barahman se

'hafīz' us ko samajh le ḳhuub haiñ ye kaam kī bāteñ

agar rif.at-talab hai jhuk ke mil har dost dushman se

mere aibon ki islahen hua kin bahas-e-dushman se

liya hai rahbar ka kaam aksar main ne dushman se

wo moti hun jo kho jata hai sahil mein samundar ke

wo dana hun bikhar ke dur hota hai jo KHirman se

faza sahra ki aankhon se jo dekhen hain wo kah denge

gul-e-KHud-rau ka aalam kam nahin gul-ha-e-gulshan se

kisi ki dosti yun KHak mein koi milata hai

mere bare mein tum aur mashware lete ho dushman se

tamasha dekhiye mahshar mein qatil mujh se laDta hai

ki apne KHun ka dhabba chhuDa de mere daman se

zamin se aasman tak chha rahi jo ye udasi hai

bagula koi uTTha hai kisi bekas ke madfan se

qarib-e-dar pahunch kar yun ghash aane ka sabab aaKHir

ye mumkin hai jhalak us ki nazar aai ho chilman se

har aafat se chaman mahfuz hai ab to ye sunta hun

adawat barq-e-sarsar ko thi mere hi nasheman se

gharaz kya bahas-o-hujjat se hamara to ye mashrab hai

jahan tak ho kinare hi rahe shaiKH-o-barahman se

'hafiz' us ko samajh le KHub hain ye kaam ki baaten

agar rifat-talab hai jhuk ke mil har dost dushman se