مرے اپنوں کو بس یہ کھل رہا تھا

مرے اپنوں کو بس یہ کھل رہا تھا

مرے پیچھے زمانہ چل رہا تھا

لہو کی بو محل سے آ رہی ہے

یہاں شاید کبھی مقتل رہا تھا

پرندو حق سے بیٹھو بلڈنگوں پر

کہ پہلے اس جگہ جنگل رہا تھا

لکھا تھا بے وفا اک بار مجھ کو

سو اس کا ہاتھ برسوں شل رہا تھا

تری دستار اچھلی اب معلم

کبھی جوتا ترا افضل رہا تھا

دھوئیں کی لہر تھی کچھ ہی چھتوں پر

مگر اندر سے ہر گھر جل رہا تھا

نبیلؔ اس سے چلو دانائی سیکھیں

وہی جو مدتوں پاگل رہا تھا