mere chaaron taraf ek aahani diwar kyun hai

mire chāroñ taraf ek āhanī dīvār kyuuñ hai

agar sachchā huuñ maiñ sach kā muqaddar haar kyuuñ hai

nishāt-o-imbisāt-o-shādmānī ziist Thahrī

to batlā.e koī jiinā mujhe āzār kyuuñ hai

masāfat zindagī hai aur duniyā ik sarā.e

to is tamsīl meñ tūfān kā kirdār kyuuñ hai

jahāñ sach kī pazīrā.ī ke da.avedār haiñ sab

usī bazm-e-suḳhan meñ bolnā dushvār kyuuñ hai

yaqīnan hādse bhī juzv-e-ḳhās-e-zindagī haiñ

hamārā shahr hī in se magar do-chār kyuuñ hai

mirī rāhoñ meñ jab hote nahīñ kāñTe 'tasavvur'

maiñ Dar kar sochtā huuñ rāsta hamvār kyuuñ hai

mere chaaron taraf ek aahani diwar kyun hai

agar sachcha hun main sach ka muqaddar haar kyun hai

nishat-o-imbisat-o-shadmani zist Thahri

to batlae koi jina mujhe aazar kyun hai

masafat zindagi hai aur duniya ek sarae

to is tamsil mein tufan ka kirdar kyun hai

jahan sach ki pazirai ke dawedar hain sab

usi bazm-e-suKHan mein bolna dushwar kyun hai

yaqinan hadse bhi juzw-e-KHas-e-zindagi hain

hamara shahr hi in se magar do-chaar kyun hai

meri rahon mein jab hote nahin kanTe 'tasawwur'

main Dar kar sochta hun rasta hamwar kyun hai