mere chehre pe jo aansu gira tha

mire chehre pe jo aañsū girā thā

na jaane kitne sho.aloñ meñ jalā thā

hamāre kaan bahre ho ga.e the

udhar vo dāstāñ-go hañs rahā thā

añdherī raat sannāTe kā aalam

nadī ke paar ik lapkā jagā thā

bahut āzār the raste meñ lekin

lahū meñ phūl-mausam hañs rahā thā

havā-e-garm yuuñ dil meñ chalī thī

mirī āñkhoñ meñ sāvan bas gayā thā

añdhere dasht se nikle ki dekhā

savā neze pe sūraj aa chukā thā

laboñ pe thī mire sub.h-e-tabassum

mire bātin meñ koī ro rahā thā

bahut din ba.ad khul kar mil rahe the

mire bachchoñ ko jaane kyā huā thā

bahut mushtāq thā shahr-e-ḳhamoshāñ

ki bastī meñ faqat 'amabar' bachā thā

mere chehre pe jo aansu gira tha

na jaane kitne shoalon mein jala tha

hamare kan bahre ho gae the

udhar wo dastan-go hans raha tha

andheri raat sannaTe ka aalam

nadi ke par ek lapka jaga tha

bahut aazar the raste mein lekin

lahu mein phul-mausam hans raha tha

hawa-e-garm yun dil mein chali thi

meri aankhon mein sawan bas gaya tha

andhere dasht se nikle ki dekha

sawa neze pe suraj aa chuka tha

labon pe thi mere subh-e-tabassum

mere baatin mein koi ro raha tha

bahut din baad khul kar mil rahe the

mere bachchon ko jaane kya hua tha

bahut mushtaq tha shahr-e-KHamoshan

ki basti mein faqat 'amabar' bacha tha