mere danton ki umr ai aarzu mujhse bhi chhoTi thi

mire dāñtoñ kī umr ai aarzū mujh se bhī chhoTī thī

usī ne saath chhoḌā dāñt-kāTī jin se roTī thī

shikāyat aarzū kī be kiye nāseh nahīñ bantī

ye sab dil-jūiyāñ zāhir kī thī bātin kī khoTī thī

havā dar dar liye phirtī hai ab to merī miTTī ko

ye hai vo ḳhaak jo ik din tire qadmoñ pe loTī thī

bahut gahre na hoñ ochhe sahī charke to puure haiñ

ḳhatā qātil kī kyā hai ik darā talvār chhoTī thī

pahāḌ us par girā ai āsmāñ kyā bas chale varna

hamāre āshiyāñ kī shāḳh sab shāḳhoñ se moTī thī

balā kar tū ne ai hastī yahāñ kī ḳhuub mehmānī

vahī karte haiñ faaqe jin ke dam se das kī roTī thī

pahuñch jaatī thī us us ghar meñ jis jis ghar kā paasā thā

jo sach pūchho to merī aarzū chausar kī goTī thī

na kyuuñ kar terī yaktā.ī kā kalima naqsh ho dil par

sabaq kī tarah barsoñ ye ibārat ham ne ghoTī thī

mujhe ḳhush ḳhush jo paayā jal ke kyā jaldī huī ruḳhsat

shab-e-vasl ai falak sab kuchh sahī niyyat kī chhoTī thī

ye sach hai 'shād' kyā thā kuchh na thā lekin tumhārā thā

na samjhā tum ne ai bārīk-bīno baat moTī thī

mere danton ki umr ai aarzu mujh se bhi chhoTi thi

usi ne sath chhoDa dant-kaTi jin se roTi thi

shikayat aarzu ki be kiye naseh nahin banti

ye sab dil-juiyan zahir ki thi baatin ki khoTi thi

hawa dar dar liye phirti hai ab to meri miTTi ko

ye hai wo KHak jo ek din tere qadmon pe loTi thi

bahut gahre na hon ochhe sahi charke to pure hain

KHata qatil ki kya hai ek dara talwar chhoTi thi

pahaD us par gira ai aasman kya bas chale warna

hamare aashiyan ki shaKH sab shaKHon se moTi thi

bala kar tu ne ai hasti yahan ki KHub mehmani

wahi karte hain faqe jin ke dam se das ki roTi thi

pahunch jati thi us us ghar mein jis jis ghar ka pasa tha

jo sach puchho to meri aarzu chausar ki goTi thi

na kyun kar teri yaktai ka kalima naqsh ho dil par

sabaq ki tarah barson ye ibarat hum ne ghoTi thi

mujhe KHush KHush jo paya jal ke kya jaldi hui ruKHsat

shab-e-wasl ai falak sab kuchh sahi niyyat ki chhoTi thi

ye sach hai 'shad' kya tha kuchh na tha lekin tumhaara tha

na samjha tum ne ai barik-bino baat moTi thi