mere dard ki kahani tere jaur ka fasana

mire dard kī kahānī tire jaur kā fasāna

hai lahū-tarang naġhma ye nashāt-gīñ tarāna

mire ham-jalīs phūlo mire ham-navā anādil

tirī Tahniyoñ pe kal tak thā mirā ġharīb-ḳhāna

maiñ muqīm-e-gulsitāñ huuñ mujhe jānte nahīñ ho

abhī chaar din hue haiñ ki jalā hai āshiyāna

tū sitam-nasīb taa.ir kahāñ jā.egā fazā se

ki matā.a-e-bāġhbāñ ab hai chaman kā āb-o-dāna

baḌī mushkiloñ se daulat ye lagī hai haath tujh ko

kahīñ luT na jaa.e pyāre tirā qīmtī ḳhazāna

na to kaf hai ḳhuun meñ tar na gavāhiyāñ mayassar

mire mehrbāñ mubārak ye qitāl-e-māhirāna

kaho bijliyoñ se jā kar ki vo aa.eñ zid se merī

maiñ rakhūñgā is chaman meñ yahīñ apnā āshiyāna

vo ḳhizāñ ke roz-o-shab the jo bahār se the behtar

ki ġharaz se be-ġharaz thā 'sahar' apnā dostāna

mere dard ki kahani tere jaur ka fasana

hai lahu-tarang naghma ye nashat-gin tarana

mere ham-jalis phulo mere ham-nawa anadil

teri Tahniyon pe kal tak tha mera gharib-KHana

main muqim-e-gulsitan hun mujhe jaante nahin ho

abhi chaar din hue hain ki jala hai aashiyana

tu sitam-nasib tair kahan jaega faza se

ki mataa-e-baghban ab hai chaman ka aab-o-dana

baDi mushkilon se daulat ye lagi hai hath tujh ko

kahin luT na jae pyare tera qimti KHazana

na to kaf hai KHun mein tar na gawahiyan mayassar

mere mehrban mubarak ye qital-e-mahirana

kaho bijliyon se ja kar ki wo aaen zid se meri

main rakhunga is chaman mein yahin apna aashiyana

wo KHizan ke roz-o-shab the jo bahaar se the behtar

ki gharaz se be-gharaz tha 'sahar' apna dostana