مرے دیوار و در آنسو مرا رخت سفر آنسو

مرے دیوار و در آنسو مرا رخت سفر آنسو

ترا دامن نہ ہوگا گر تو جائیں گے کدھر آنسو

پلٹ آئی دعا پھر کیوں کوئی خورشید مانگا تھا

مگر کیا عرش تک جاتے مرے بے بال و پر آنسو

وہ پتھر دل مجھے محفل میں ہنستے دیکھ حیراں تھا

میں دانستہ ہی رکھ آئی تھی اس دن اپنے گھر آنسو

ہوا تھی ایسی غصیلی کہ بادل لے اڑی سارے

یہ غم سہنے میں سوکھے ہیں زمیں کے کس قدر آنسو

شب تنہا نظر آتا ہے تجھ میں عکس یہ کس کا

مری آنکھوں میں رہتا ہے تو میری فکر کر آنسو