mere dil mein achanak ye KHalish kya

mire dil meñ achānak ye ḳhalish kyā

koī karne lagā hai sarzanish kyā

hazāroñ nafrateñ dil meñ basī haiñ

bane phirte ho tum sūfī-manish kyā

agar siine meñ kiine kuchh nahīñ haiñ

to ye takrār kyā ye chapqulash kyā

jidhar dekho 'adāvat hī 'adāvat

kabhī badlegī duniyā kī ravish kyā

mohabbat kā sabaq ghar meñ nahīñ hai

zamāne se umīd-e-parvarish kyā

koī jauhar hai dil meñ kār-farmā

vagarna gardish-e-ḳhūñ kyā tapish kyā

hai bahr-e-dars-e-insāñ jazb-e-bāham

vagarna zarroñ meñ bāham kashish kyā

maiñ har vaadī meñ sargardāñ nahīñ huuñ

mire ash'ār kyā dād-o-dahish kyā

mere dil mein achanak ye KHalish kya

koi karne laga hai sarzanish kya

hazaron nafraten dil mein basi hain

bane phirte ho tum sufi-manish kya

agar sine mein kine kuchh nahin hain

to ye takrar kya ye chapqulash kya

jidhar dekho 'adawat hi 'adawat

kabhi badlegi duniya ki rawish kya

mohabbat ka sabaq ghar mein nahin hai

zamane se umid-e-parwarish kya

koi jauhar hai dil mein kar-farma

wagarna gardish-e-KHun kya tapish kya

hai bahr-e-dars-e-insan jazb-e-baham

wagarna zarron mein baham kashish kya

main har wadi mein sargardan nahin hun

mere ash'ar kya dad-o-dahish kya