mere dil se dil ko mila kar to dekho

mire dil se dil ko milā kar to dekho

mohabbat kī duniyā basā kar to dekho

dar-e-āstāñ par khaḌā huuñ maiñ kab se

zarā ruḳh se parda haTā kar to dekho

abhī tak to mujh se rahe ho ḳhafā tum

magar ab zarā muskurā kar to dekho

bujhāoge jitne vo bhaḌkeñge utne

mohabbat ke sho.ale bujhā kar to dekho

ye bād-e-muḳhālif na gul kar sakegī

charāġh-e-mohabbat jalā kar to dekho

kaTegā safar ye salāmat-ravī se

mujhe rāhbar tum banā kar to dekho

karāmat to apnī dikhāo zarā tum

mujhe apnā jaisā banā kar to dekho

suneñge yaqīnan vo afsāna-e-ġham

'azīz' un ko dil se sunā kar to dekho

kabhī dil se apnā samajh kar zarā tum

'azīz' apnā mujh ko banā kar to dekho

mere dil se dil ko mila kar to dekho

mohabbat ki duniya basa kar to dekho

dar-e-astan par khaDa hun main kab se

zara ruKH se parda haTa kar to dekho

abhi tak to mujh se rahe ho KHafa tum

magar ab zara muskura kar to dekho

bujhaoge jitne wo bhaDkenge utne

mohabbat ke shoale bujha kar to dekho

ye baad-e-muKHalif na gul kar sakegi

charagh-e-mohabbat jala kar to dekho

kaTega safar ye salamat-rawi se

mujhe rahbar tum bana kar to dekho

karamat to apni dikhao zara tum

mujhe apna jaisa bana kar to dekho

sunenge yaqinan wo afsana-e-gham

'aziz' un ko dil se suna kar to dekho

kabhi dil se apna samajh kar zara tum

'aziz' apna mujh ko bana kar to dekho