mere dukh dard har ek aankh se ojhal paDe the

mire dukh dard har ik aañkh se ojhal paḌe the

shukr-sad-shukr ki bas ruuh pe hī bal paḌe the

kisī maqsad se tire paas nahīñ aa.e haiñ

kahīñ jaanā hī thā so terī taraf chal paḌe the

ek maiñ hī nahīñ shab chhat pe basar kartā thā

chāñd ke pīchhe ka.ī aur bhī pāgal paḌe the

kaisā nazzārā thā kohsāroñ kī shahzādī kā

baam par vo khaḌī thī farsh pe bādal paḌe the

jald-bāzoñ ne bichhaḌne meñ baḌī ujlat kī

ek ik mas.ale ke varna ka.ī hal paḌe the

ḳhud se ḳhud tak kā safar sahl nahīñ thā itnā

rāste meñ ka.ī dariyā ka.ī jañgal paḌe the

ijz ke ashk bahāte hue shab so gayā maiñ

sub.h uTThā to mire kaam mukammal paḌe the

dhyān tayyārī kā aayā hī nahīñ ham ko 'aqīl'

safar-e-ishq thā be-raḳht-e-safar chal paḌe the

mere dukh dard har ek aankh se ojhal paDe the

shukr-sad-shukr ki bas ruh pe hi bal paDe the

kisi maqsad se tere pas nahin aae hain

kahin jaana hi tha so teri taraf chal paDe the

ek main hi nahin shab chhat pe basar karta tha

chand ke pichhe kai aur bhi pagal paDe the

kaisa nazzara tha kohsaron ki shahzadi ka

baam par wo khaDi thi farsh pe baadal paDe the

jald-bazon ne bichhaDne mein baDi ujlat ki

ek ek masale ke warna kai hal paDe the

KHud se KHud tak ka safar sahl nahin tha itna

raste mein kai dariya kai jangal paDe the

ijz ke ashk bahate hue shab so gaya main

subh uTTha to mere kaam mukammal paDe the

dhyan tayyari ka aaya hi nahin hum ko 'aqil'

safar-e-ishq tha be-raKHt-e-safar chal paDe the