mere ghar ke log jo ghar mujhi ko supurd kar ke chale gae

mire ghar ke log jo ghar mujhī ko supurd kar ke chale ga.e

mirā bār-e-ġham na uThā sake to mujhī pe dhar ke chale ga.e

kabhī ghar hamāre vo aa ga.e to likhā nasīb kā dekhiye

koī baat un se na ho sakī vo zarā Thahar ke chale ga.e

jahāñ lutf-e-sair na pā sake na jahāñ kā haal batā sake

jahāñ zindagī meñ na jā sake vahāñ log mar ke chale ga.e

koī baat un se karegā kyā vo javāb le ke phiregā kyā

unheñ dekh kar jo havās hī mire nāma-bar ke chale ga.e

hai sarā-e-dahar ajab makāñ jo musāfir aa ke rahe yahāñ

kabhī tiin din kabhī chaar din vo Thahar Thahar ke chale ga.e

nahīñ aaj rañg vo ḳhalq kā kabhī ye zamāne kā haal thā

hameñ sar pe apne biThā liyā jo kisī bashar ke chale ga.e

hai adam kā saḳht vo marhala jahāñ apnā apnā hai rāsta

vo safar nahīñ ye jo saath ham kisī ham-safar ke chale ga.e

tire pāsbāñ se tirā pata kabhī ham ne pūchhā to ye milā

ki makāñ se vo sar-e-shām hī kahīñ ban-sañvar ke chale ga.e

unheñ bazm-e-ġhair meñ dekh kar kaheñ kyā 'rashīd' ki kyā huā

kabhī zabt kar ke Thahar ga.e kabhī aah bhar ke chale ga.e

mere ghar ke log jo ghar mujhi ko supurd kar ke chale gae

mera bar-e-gham na uTha sake to mujhi pe dhar ke chale gae

kabhi ghar hamare wo aa gae to likha nasib ka dekhiye

koi baat un se na ho saki wo zara Thahar ke chale gae

jahan lutf-e-sair na pa sake na jahan ka haal bata sake

jahan zindagi mein na ja sake wahan log mar ke chale gae

koi baat un se karega kya wo jawab le ke phirega kya

unhen dekh kar jo hawas hi mere nama-bar ke chale gae

hai sara-e-dahar ajab makan jo musafir aa ke rahe yahan

kabhi tin din kabhi chaar din wo Thahar Thahar ke chale gae

nahin aaj rang wo KHalq ka kabhi ye zamane ka haal tha

hamein sar pe apne biTha liya jo kisi bashar ke chale gae

hai adam ka saKHt wo marhala jahan apna apna hai rasta

wo safar nahin ye jo sath hum kisi ham-safar ke chale gae

tere pasban se tera pata kabhi hum ne puchha to ye mila

ki makan se wo sar-e-sham hi kahin ban-sanwar ke chale gae

unhen bazm-e-ghair mein dekh kar kahen kya 'rashid' ki kya hua

kabhi zabt kar ke Thahar gae kabhi aah bhar ke chale gae