mere gulshan se kanTon ki nigahbani nahin jati

mire gulshan se kāñToñ kī nigahbānī nahīñ jaatī

bahāroñ meñ bhī apnī chāk-dāmānī nahīñ jaatī

ghaTā.eñ zulm kī chāroñ taraf se gher letī haiñ

magar kirdār ke sūraj kī tābānī nahīñ jaatī

zarūrat roz kahtī hai mujhe samjhauta karne ko

magar zardār ke dar tak ye peshānī nahīñ jaatī

hazāroñ bastiyāñ tārāj kar Dālīñ magar phir bhī

vatan ke dushmanoñ kī fitna-sāmānī nahīñ jaatī

naqābeñ oḌh lī haiñ maslahat kī jab se chehroñ par

ḳhud apnī shakl bhī ab ham se pahchānī nahīñ jaatī

koī ġhurbat meñ donoñ vaqt kartā hai yahāñ faaqe

kisī ke ghar se daulat kī farāvānī nahīñ jaatī

mujhe ḳhud-ehtisābī kā hunar bhī baḳhsh de maulā

ki apnī koī ḳhāmī mujh se pahchānī nahīñ jaatī

mere gulshan se kanTon ki nigahbani nahin jati

bahaaron mein bhi apni chaak-damani nahin jati

ghaTaen zulm ki chaaron taraf se gher leti hain

magar kirdar ke suraj ki tabani nahin jati

zarurat roz kahti hai mujhe samjhauta karne ko

magar zardar ke dar tak ye peshani nahin jati

hazaron bastiyan taraj kar Dalin magar phir bhi

watan ke dushmanon ki fitna-samani nahin jati

naqaben oDh li hain maslahat ki jab se chehron par

KHud apni shakl bhi ab hum se pahchani nahin jati

koi ghurbat mein donon waqt karta hai yahan faqe

kisi ke ghar se daulat ki farawani nahin jati

mujhe KHud-ehtisabi ka hunar bhi baKHsh de maula

ki apni koi KHami mujh se pahchani nahin jati