mere habib tere husn ka jawab nahin

mire habīb tire husn kā javāb nahīñ

tujhe maiñ dekh sakūñ mujh meñ itnī taab nahīñ

jo tujh se duur haiñ vo bhī uThā rahe haiñ faiz

tire karam kā ḳhudāyā koī hisāb nahīñ

vo ma.arifat ke ujāloñ ko pā nahīñ sakte

ki jin ke haath meñ allāh kī kitāb nahīñ

akelā jānib-e-manzil nikal paḌā huuñ maiñ

rah-e-vafā meñ mirā koī ham-rikāb nahīñ

kabhī vo ishq kī manzil ko pā nahīñ saktā

ki jis ke dil meñ mohabbat kā iztirāb nahīñ

jo merī sāñsoñ se mahsūs kar rahe haiñ log

ye us kī ḳhushbū hai ye nik.hat-e-gulāb nahīñ

umar ke daur-e-ḳhilāfat kī baat hī kuchh hai

koī sunahrā zamāne meñ is se baab nahīñ

hazār DhūñD lo tiryāk zahr-e-ġham ke liye

mire rasūl ke jaisā koī luaab nahīñ

talāsh-o-justujū jis kā nahīñ hai sheva 'shād'

vo aadmī kisī maqsad meñ kāmyāb nahīñ

mere habib tere husn ka jawab nahin

tujhe main dekh sakun mujh mein itni tab nahin

jo tujh se dur hain wo bhi uTha rahe hain faiz

tere karam ka KHudaya koi hisab nahin

wo marifat ke ujalon ko pa nahin sakte

ki jin ke hath mein allah ki kitab nahin

akela jaanib-e-manzil nikal paDa hun main

rah-e-wafa mein mera koi ham-rikab nahin

kabhi wo ishq ki manzil ko pa nahin sakta

ki jis ke dil mein mohabbat ka iztirab nahin

jo meri sanson se mahsus kar rahe hain log

ye us ki KHushbu hai ye nikhat-e-gulab nahin

umar ke daur-e-KHilafat ki baat hi kuchh hai

koi sunahra zamane mein is se bab nahin

hazar DhunD lo tiryak zahr-e-gham ke liye

mere rasul ke jaisa koi luab nahin

talash-o-justuju jis ka nahin hai shewa 'shad'

wo aadmi kisi maqsad mein kaamyab nahin