مرے حبیب ترے حسن کا جواب نہیں

مرے حبیب ترے حسن کا جواب نہیں

تجھے میں دیکھ سکوں مجھ میں اتنی تاب نہیں

جو تجھ سے دور ہیں وہ بھی اٹھا رہے ہیں فیض

ترے کرم کا خدایا کوئی حساب نہیں

وہ معرفت کے اجالوں کو پا نہیں سکتے

کہ جن کے ہاتھ میں اللہ کی کتاب نہیں

اکیلا جانب منزل نکل پڑا ہوں میں

رہ وفا میں مرا کوئی ہم رکاب نہیں

کبھی وہ عشق کی منزل کو پا نہیں سکتا

کہ جس کے دل میں محبت کا اضطراب نہیں

جو میری سانسوں سے محسوس کر رہے ہیں لوگ

یہ اس کی خوشبو ہے یہ نکہت گلاب نہیں

عمر کے دور خلافت کی بات ہی کچھ ہے

کوئی سنہرا زمانے میں اس سے باب نہیں

ہزار ڈھونڈ لو تریاک زہر غم کے لئے

مرے رسول کے جیسا کوئی لعاب نہیں

تلاش و جستجو جس کا نہیں ہے شیوہ شادؔ

وہ آدمی کسی مقصد میں کامیاب نہیں