mere hijr ka tu ilaj kar koi hal bata mere saiyan

mire hijr kā tū 'ilāj kar koī hal batā mire sā.iyāñ

mire karb kī mire dard kī koī kar davā mire sā.iyāñ

mujhe dekh jā mire chārāgar maiñ tirī nazar kā shikār huuñ

kahāñ kyoñ huā kahāñ kyā huā na mujhe sunā mire sā.iyāñ

zarā haath rakh ke tū haath par mirī dhaḌkanoñ ko qarār de

mujhe reza-reza sameT kar tū gale lagā mire sā.iyāñ

na batā mujhe ki zamāne ne tujhe kaise mujh se judā kiyā

tujhe 'ishq hai jo abhī talak mire paas aa mire sā.iyāñ

mire hausle ko tū daad de mire husn-e-zan pe tū jaan de

maiñ yahī rahā sadā sochtā tū hai be-ḳhatā mire sā.iyāñ

tire chauñkne se pata chalā mirā naam ab bhī 'azīz hai

mire zikr par jo jhukā hai ab zarā sar uThā mire sā.iyāñ

mujhe shauq-e-lutf se dekh kar na to kar ishāre fareb ke

yuuñ palaT palaT ke na baat kar na yahāñ se jā mire sā.iyāñ

mere hijr ka tu 'ilaj kar koi hal bata mere saiyan

mere karb ki mere dard ki koi kar dawa mere saiyan

mujhe dekh ja mere chaaragar main teri nazar ka shikar hun

kahan kyon hua kahan kya hua na mujhe suna mere saiyan

zara hath rakh ke tu hath par meri dhaDkanon ko qarar de

mujhe reza-reza sameT kar tu gale laga mere saiyan

na bata mujhe ki zamane ne tujhe kaise mujh se juda kiya

tujhe 'ishq hai jo abhi talak mere pas aa mere saiyan

mere hausle ko tu dad de mere husn-e-zan pe tu jaan de

main yahi raha sada sochta tu hai be-KHata mere saiyan

tere chaunkne se pata chala mera nam ab bhi 'aziz hai

mere zikr par jo jhuka hai ab zara sar uTha mere saiyan

mujhe shauq-e-lutf se dekh kar na to kar ishaare fareb ke

yun palaT palaT ke na baat kar na yahan se ja mere saiyan