mere hisar se bahar bula raha hai mujhe

mire hisār se bāhar bulā rahā hai mujhe

koī hasīn sā manzar bulā rahā hai mujhe

jahāñ muqīm thā maiñ ek ajnabī kī tarah

vahī makān ab aksar bulā rahā hai mujhe

jo thak ke baiTh gayā huuñ maiñ biich raste meñ

to ab vo miil kā patthar bulā rahā hai mujhe

huā hai tishna-labī se muāhida merā

abas hī roz samundar bulā rahā hai mujhe

bujhā diye haiñ usī ne ka.ī charāġh mire

jo ek sham.a jalā kar bulā rahā hai mujhe

vo jāntā hai maiñ us ke sitam kā ḳhūgar huuñ

so baar baar sitamgar bulā rahā hai mujhe

bulā rahā hai to khul kar kabhī bulā.e vo

bas ik ishāre se aksar bulā rahā hai mujhe

dayār-e-ġhair meñ rahtā huuñ maiñ magar 'ālam'

har ek lamha mirā ghar bulā rahā hai mujhe

mere hisar se bahar bula raha hai mujhe

koi hasin sa manzar bula raha hai mujhe

jahan muqim tha main ek ajnabi ki tarah

wahi makan ab aksar bula raha hai mujhe

jo thak ke baiTh gaya hun main bich raste mein

to ab wo mil ka patthar bula raha hai mujhe

hua hai tishna-labi se muahida mera

abas hi roz samundar bula raha hai mujhe

bujha diye hain usi ne kai charagh mere

jo ek shama jala kar bula raha hai mujhe

wo jaanta hai main us ke sitam ka KHugar hun

so bar bar sitamgar bula raha hai mujhe

bula raha hai to khul kar kabhi bulae wo

bas ek ishaare se aksar bula raha hai mujhe

dayar-e-ghair mein rahta hun main magar 'alam'

har ek lamha mera ghar bula raha hai mujhe