mere jazbaat-e-rangin ki farawani nahin jati

mire jazbāt-e-rañgīñ kī farāvānī nahīñ jaatī

ki āñkhoñ se tire jalve kī tābānī nahīñ jaatī

faroġh-e-husn hai yā merī nazroñ kī ye ḳhāmī hai

ba-har-sūrat tirī tasvīr pahchānī nahīñ jaatī

mohabbat aap kī dil se bhulā duuñ kis tarah kyuuñ kar

ba-mushkil shai jo aa.ī ho ba-āsānī nahīñ jaatī

kahāñ tū khīñch laayā ai mazāq-e-āshiqī mujh ko

jahāñ mujh se mirī tasvīr pahchānī nahīñ jaatī

mujhe tark-e-ta.alluq par na kar majbūr ai nāseh

ḳhilāf-e-aql koī baat ho maanī nahīñ jaatī

tumhāre jaur-e-behad ne ye baḳhshā hai sharaf mujh ko

shikast-e-dil kī bhī āvāz pahchānī nahīñ jaatī

koī 'sābir' se dīvāne ko samjhā.e bhalā kyuuñ kar

parastār-e-junūñ kī chāk-dāmānī nahīñ jaatī

mere jazbaat-e-rangin ki farawani nahin jati

ki aankhon se tere jalwe ki tabani nahin jati

farogh-e-husn hai ya meri nazron ki ye KHami hai

ba-har-surat teri taswir pahchani nahin jati

mohabbat aap ki dil se bhula dun kis tarah kyun kar

ba-mushkil shai jo aai ho ba-asani nahin jati

kahan tu khinch laya ai mazaq-e-ashiqi mujh ko

jahan mujh se meri taswir pahchani nahin jati

mujhe tark-e-talluq par na kar majbur ai naseh

KHilaf-e-aql koi baat ho mani nahin jati

tumhaare jaur-e-behad ne ye baKHsha hai sharaf mujh ko

shikast-e-dil ki bhi aawaz pahchani nahin jati

koi 'sabir' se diwane ko samjhae bhala kyun kar

parastar-e-junun ki chaak-damani nahin jati