mere junun ko hawas mein shumar kar lega

mire junūñ ko havas meñ shumār kar legā

vo mere tiir se mujh ko shikār kar legā

mujhe gumāñ bhī nahīñ thā ki Dūbtā huā dil

muhīt jism ko ik roz paar kar legā

maiñ us kī raah chalūñ bhī to fā.eda kyā hai

vo koī aur ravish iḳhtiyār kar legā

fasīl-e-shahr meñ rukne kī hī nahīñ ye ḳhabar

jo kaam ham se na hogā ġhubār kar legā

vo gul-badan kabhī niklā jo sair-e-sahrā ko

to apne saath havā-e-bahār kar legā

jahāñ pe baat faqat naqd-e-jāñ se bantī ho

vo ḳhush-kalām vahāñ bhī udhār kar legā

ham aise log bahut ḳhush-gumān hote haiñ

ye dil zarūr tirā e'tibār kar legā

khulegā is pe hī 'anjum'-ḳhalīq bāb-e-qubūl

jo apnā haqq-e-talab ustuvār kar legā

mere junun ko hawas mein shumar kar lega

wo mere tir se mujh ko shikar kar lega

mujhe guman bhi nahin tha ki Dubta hua dil

muhit jism ko ek roz par kar lega

main us ki rah chalun bhi to faeda kya hai

wo koi aur rawish iKHtiyar kar lega

fasil-e-shahr mein rukne ki hi nahin ye KHabar

jo kaam hum se na hoga ghubar kar lega

wo gul-badan kabhi nikla jo sair-e-sahra ko

to apne sath hawa-e-bahaar kar lega

jahan pe baat faqat naqd-e-jaan se banti ho

wo KHush-kalam wahan bhi udhaar kar lega

hum aise log bahut KHush-guman hote hain

ye dil zarur tera e'tibar kar lega

khulega is pe hi 'anjum'-KHaliq bab-e-qubul

jo apna haqq-e-talab ustuwar kar lega