مرے خیال کی ندرت کسی کو کیا معلوم

مرے خیال کی ندرت کسی کو کیا معلوم

طلسم رنگ تمنا ہے اب ہوا معلوم

کہیں پناہ نہیں ہے ہمیں تو چلنا ہے

اگرچہ پیروں میں دم ہے نہ راستا معلوم

اسے اڑا کے ہوا لے گئی نہ جانے کہاں

کدھر لگائے گا دریا ہمیں خدا معلوم

ستارہ ٹوٹ رہا تھا تو سب نے دیکھا تھا

گیا کہاں یہ کسی کو نہ ہو سکا معلوم

اسے کسی کو سنا دیجیے دعا دے گا

وہ ایک نغمہ ہے خالق ہے جس کا نا معلوم

نہ جانے کس نے مظفرؔ کی مخبری کی ہے

ترے سوا تو کسی اور کو نہ تھا معلوم