mere KHeme KHasta-haal mein hain mere raste dhund ke jal mein hain

mire ḳheme ḳhasta-hāl meñ haiñ mire raste dhund ke jaal meñ haiñ

mujhe shaam huī hai jañgal meñ mire saare sitāre zavāl meñ haiñ

mujhe rañgoñ se koī shaġhl nahīñ mujhe ḳhushbū meñ koī daḳhl nahīñ

mire naam kā koī naḳhl nahīñ mire mausam ḳhāk-e-malāl meñ haiñ

ākāsh hai qadmoñ ke nīche dariyā kā paanī sar par hai

ik machhlī naav pe baiThī hai aur sab machhuvāre jaal meñ haiñ

ye duniyā akbar zulmoñ kī ham majbūrī kī anārkalī

ham dīvāroñ ke biich meñ haiñ ham narġha-e-jabr-o-jalāl meñ haiñ

mire dil ke nuur se baḌh ke nahīñ mirī jaañ ke surūr se baḌh ke nahīñ

jo maah o mehr falak par haiñ jo laal o guhar pātāl meñ haiñ

ik maġhrib aayā mashriq meñ mirī fauj ke TukḌe kar Daale

ab aadhe sipāhī junūb meñ haiñ aur aadhe sipāhī shumāl meñ haiñ

īmān kī chhāgal phuuT ga.ī āmāl kī lāThī TuuT ga.ī

ham aise gallabānoñ ke sab naaqe ḳhauf-e-qitāl meñ haiñ

mere KHeme KHasta-haal mein hain mere raste dhund ke jal mein hain

mujhe sham hui hai jangal mein mere sare sitare zawal mein hain

mujhe rangon se koi shaghl nahin mujhe KHushbu mein koi daKHl nahin

mere nam ka koi naKHl nahin mere mausam KHak-e-malal mein hain

aakash hai qadmon ke niche dariya ka pani sar par hai

ek machhli naw pe baiThi hai aur sab machhuware jal mein hain

ye duniya akbar zulmon ki hum majburi ki anarkali

hum diwaron ke bich mein hain hum nargha-e-jabr-o-jalal mein hain

mere dil ke nur se baDh ke nahin meri jaan ke surur se baDh ke nahin

jo mah o mehr falak par hain jo lal o guhar patal mein hain

ek maghrib aaya mashriq mein meri fauj ke TukDe kar Dale

ab aadhe sipahi junub mein hain aur aadhe sipahi shumal mein hain

iman ki chhagal phuT gai aamal ki laThi TuT gai

hum aise gallabanon ke sab naqe KHauf-e-qital mein hain