مرے خدا یہ مری ذات پر کرم کر دے

مرے خدا یہ مری ذات پر کرم کر دے

دیار زیست میں اب بے نیاز غم کر دے

کسی بھی دل میں نہ ہوں بدگمانیاں پیدا

تعلقات کو اس درجہ محترم کر دے

ملی حیات ہمیں ایسا حادثہ بن کر

وہ حادثہ جو پہاڑوں کی آنکھ نم کر دے

حصار تیرہ شبی سے نکال دے منزل

چراغ شوق فروزاں قدم قدم کر دے

ستم پرست بہت ہے مزاج اہل نظر

حصول فن بھی کرے ہاتھ بھی قلم کر دے

دعائے خیر ہی لب پر رہے سدا مختارؔ

وہ جو بھی چاہے بہ یک جنبش قلم کر دے