mere KHulus ki shiddat se koi Dar bhi gaya

mire ḳhulūs kī shiddat se koī Dar bhī gayā

vo paas aa to rahā thā magar Thahar bhī gayā

ye dekhnā thā bachāne bhī koī aatā hai

agar maiñ Duub rahā thā to ḳhud ubhar bhī gayā

ai rāste ke darḳhto sameT lo saaya

tumhāre jaal se bach kar koī guzar bhī gayā

kisī tarah se tumhārī jabīñ chamak to ga.ī

ye aur baat siyāhī meñ haath bhar bhī gayā

usī pahāḌ ne phūñke the kyā ka.ī jañgal

jo ḳhaak ho ke mire haath par bikhar bhī gayā

yahīñ kahīñ mire hoñToñ ke paas phirtā hai

vo ek lafz ki jo zehn se utar bhī gayā

vo shāḳh jhuul ga.ī jis pe paañv qaa.em the

'shakeb' varna mirā haath tā-samar bhī gayā

mere KHulus ki shiddat se koi Dar bhi gaya

wo pas aa to raha tha magar Thahar bhi gaya

ye dekhna tha bachane bhi koi aata hai

agar main Dub raha tha to KHud ubhar bhi gaya

ai raste ke darKHto sameT lo saya

tumhaare jal se bach kar koi guzar bhi gaya

kisi tarah se tumhaari jabin chamak to gai

ye aur baat siyahi mein hath bhar bhi gaya

usi pahaD ne phunke the kya kai jangal

jo KHak ho ke mere hath par bikhar bhi gaya

yahin kahin mere honTon ke pas phirta hai

wo ek lafz ki jo zehn se utar bhi gaya

wo shaKH jhul gai jis pe panw qaem the

'shakeb' warna mera hath ta-samar bhi gaya