مرے لبوں پہ غم زندگی کی بات نہیں

مرے لبوں پہ غم زندگی کی بات نہیں

کچھ مجھ کو فکر علاج غم حیات نہیں

میں آشنائے غم کائنات ہوں لیکن

مرے ملال سے آگاہ کائنات نہیں

غم حیات کو سینے سے جو لگا نہ سکے

مری نظر میں وہ شائستۂ حیات نہیں

بنائے حسن رخ کائنات ہم بھی ہیں

تمہیں سے دل کشیٔ بزم کائنات نہیں

ہیں زندگی کی بہاریں انہیں نصیب تو کیا

جنہیں شعور چمن بندیٔ حیات نہیں

کسے سنائیں غم زندگی کے افسانے

یہاں کوئی بھی تو آسودۂ حیات نہیں

تری جفائیں بھی مجھ کو عزیز ہیں لیکن

یہ کیا کہ مجھ پہ تری چشم التفات نہیں

بلا سے عشرت امروز خواب ہو کہ خیال

عتیقؔ راحت فردا تو بے ثبات نہیں