مرے لہو سے ہے اک رنگ نو بہار غزل

مرے لہو سے ہے اک رنگ نو بہار غزل

غریب شہر ہوں لیکن ہوں شہر یار غزل

جو چھو کے نکلی ہے موج نسیم عشق کبھی

مہک مہک اٹھے گیسوئے تابدار غزل

خلوص عشق و خلوص حیات کی تصویر

ہر ایک شعر غزل ہے کہ شاہکار غزل

ہمارے غم میں غم عشق کائنات بھی ہے

ہمارے اشکوں سے شاداب ہے بہار غزل

ہمارے ذوق جنوں سے ہے کائنات حسین

ہم اہل عشق سے ہے رونق دیار غزل

وہ کائنات کا دکھ سکھ غزل کے پردے میں

ہوا نہ میرؔ سا پھر کوئی شہر یار غزل