mere miTne pe gar tu bhi miTa hota to kya hota

mire miTne pe gar tū bhī miTā hotā to kyā hotā

tujhe bhī sabr ai dil aa gayā hotā to kyā hotā

chale aate haiñ lākhoñ sarfaroshī kī tamannā meñ

tirā kūcha agar dārushshifā hotā to kyā hotā

adam se maiñ na aatā is jahāñ meñ ġham uThāne ko

agar hastī mujhe terā patā hotā to kyā hotā

tujhī pe munsifī hai le tū hī insāf se kah de

agar terī tarah maiñ bevafā hotā to kyā hotā

sitāre kyuuñ dikhātī mujh ko din bhar merī nākāmī

vo shab ko mal ke afshāñ aa gayā hotā to kyā hotā

sar-e-shorīda ko maiñ pattharoñ se phoḌtā phirtā

but-e-kāfir jo tū merā ḳhudā hotā to kyā hotā

sabāt us ko nahīñ phir bhī fidā hai hazrat-e-insāñ

jo ye dār-e-fanā dār-e-baqā hotā to kyā hotā

kisī ke paas rah kar bhī taḌapte hijr meñ 'nādir'

hameñ jannat meñ bhī kuchh aasrā hotā to kyā hotā

mere miTne pe gar tu bhi miTa hota to kya hota

tujhe bhi sabr ai dil aa gaya hota to kya hota

chale aate hain lakhon sarfaroshi ki tamanna mein

tera kucha agar darushshifa hota to kya hota

adam se main na aata is jahan mein gham uThane ko

agar hasti mujhe tera pata hota to kya hota

tujhi pe munsifi hai le tu hi insaf se kah de

agar teri tarah main bewafa hota to kya hota

sitare kyun dikhati mujh ko din bhar meri nakaami

wo shab ko mal ke afshan aa gaya hota to kya hota

sar-e-shorida ko main pattharon se phoDta phirta

but-e-kafir jo tu mera KHuda hota to kya hota

sabaat us ko nahin phir bhi fida hai hazrat-e-insan

jo ye dar-e-fana dar-e-baqa hota to kya hota

kisi ke pas rah kar bhi taDapte hijr mein 'nadir'

hamein jannat mein bhi kuchh aasra hota to kya hota