مرے نالوں کا ہوتا ہے خدا جانے اثر کب تک

مرے نالوں کا ہوتا ہے خدا جانے اثر کب تک

مری دنیا رہے گی اس طرح زیر و زبر کب تک

سفر مسلک مرا مجھ کو کوئی اتنا تو سمجھائے

کہ اس کوچے میں ہوگی زندگی میری بسر کب تک

جہاد زندگی میں سخت کوشی شرط اول ہے

یہ سوز عشق تاکے لذت داغ جگر کب تک

وہی مجنوں وہی لیلیٰ وہی وامق وہی عذرا

میں دہراتا رہوں قصے بہ انداز دگر کب تک

جو رفعت کی تمنا ہو تو جذب و شوق پیدا کر

رہے گا اس چمن میں تو رہین بال و پر کب تک

گیا دور جوانی اب تو منظرؔ ہوش میں آؤ

خمار شب کہاں تک لذت خواب سحر کب تک