mere nalon ka hota hai KHuda jaane asar kab tak

mire nāloñ kā hotā hai ḳhudā jaane asar kab tak

mirī duniyā rahegī is tarah zer-o-zabar kab tak

safar maslak mirā mujh ko koī itnā to samjhā.e

ki is kūche meñ hogī zindagī merī basar kab tak

jihād-e-zindagī meñ saḳht-koshī shart-e-avval hai

ye soz-e-ishq taake lazzat-e-dāġh-e-jigar kab tak

vahī majnūñ vahī lailā vahī vāmiq vahī azrā

maiñ dohrātā rahūñ qisse ba-andāz-e-digar kab tak

jo rif.at kī tamanna ho to jazb-o-shauq paidā kar

rahegā is chaman meñ tū rahīn-e-bāl-o-par kab tak

gayā daur-e-javānī ab to 'manzar' hosh meñ aao

ḳhumār-e-shab kahāñ tak lazzat-e-ḳhvāb-e-sahar kab tak

mere nalon ka hota hai KHuda jaane asar kab tak

meri duniya rahegi is tarah zer-o-zabar kab tak

safar maslak mera mujh ko koi itna to samjhae

ki is kuche mein hogi zindagi meri basar kab tak

jihad-e-zindagi mein saKHt-koshi shart-e-awwal hai

ye soz-e-ishq take lazzat-e-dagh-e-jigar kab tak

wahi majnun wahi laila wahi wamiq wahi azra

main dohraata rahun qisse ba-andaz-e-digar kab tak

jo rifat ki tamanna ho to jazb-o-shauq paida kar

rahega is chaman mein tu rahin-e-baal-o-par kab tak

gaya daur-e-jawani ab to 'manzar' hosh mein aao

KHumar-e-shab kahan tak lazzat-e-KHwab-e-sahar kab tak